Jinsi ya kufanya nyumba yako inuke vizuri kila wakati

KILA nyumba ina harufu yake ya kipekee; wakati mwingine ni nzuri na wakati mwingine si ya kupendeza. Kwa wale wanasumbuka kutengeneza nyumba yenye harufu nzuri, suluhisho lipo.

Wataalamu wa usafi wa mazingira ya nyumbani, wanashauri mbinu rahisi na nafuu zinazoweza kubadili nyumba kuwa mahali panapovutia kwa harufu nzuri wakati wote.

Usafi ndiyo nguzo

Kwanza, jambo la msingi ni kuhakikisha nyumba inasafishwa mara kwa mara, kwa kupiga deki, kufuta vumbi na kuondoa vitu visivyotumika. Bila kufanya hivi, harufu mbaya inaweza kuendelea kujitokeza.

Ili kupata matokeo mazuri, wakati wa usafi ni muhimu kuzingatia eneo lenye zulia, mapazia na vitambaa; kwa kuhakikisha yanafuliwa mara kwa mara ili kuepuka kukusanya vumbi.

Pia, eneo la taka, hili ndilo chanzo kikuu cha harufu mbaya nyumbani, hivyo hakikisha ni safi kila wakati.

Friji, ikiwezekana safisha angalau mara moja kwa wiki, kuondoa mabaki yanayosababisha harufu.

Nguo, inashauriwa kwamba usihifadhi nguo chafu kwa muda mrefu; zifue na hakikisha zimekauka vizuri.

Pili, weka mimea kama rosemary, mint au maua kama snake plant ndani. Hii inavutia na pia inasaidia kusafisha hewa na kuondoa vichafuzi vinavyosababisha harufu. Aidha, maua kama yasmini, waridi au chani huongeza mvuto wa harufu safi nyumbani.

Tatu, tumia air freshener ya asilia. Unaweza kuchanganya maji na mafuta ya lavender na limao, na kunyunyiza (spray), ndani ya nyumba kila siku.

Pia, unaweza kuchemsha maganda ya chungwa, mdalasini au majani kavu ya maua kupata harufu ya asili.

Mbinu nyingine ni kutumia baking soda na siki (vinegar), kuondoa unyevu na harufu mbaya. Siki pia ni dawa ya kusafisha na kuua vijidudu.

Mbinu za nyongeza

Ni vyema kuwa na utaratibu wa kufungua madirisha na milango kila asubuhi, ili kuruhusu hewa safi na mwanga wa jua kuzunguka. Unaweza pia kutumia mishumaa yenye harufu nzuri kama ya lavenda, ua rose au matunda. Harufu hizi laini zinatajwa kuongeza mandhari ya kustarehesha hasa wakati wa baridi.

Tumia pia mchanganyiko wa maua na majani yaliyokaushwa na kuyaweka kabatini au kwenye chumba cha kulala, kuongeza harufu nzuri.

Inaweza pia kutumia vifaa vya kusambaza harufu (diffusers), kwa ajili ya udi na manukato mengine; yakiwamo ya kupachika ukutani.

Eneo lingine la kuzingatia sana ni usafi wa choo na bafu. Hakikisha sakafu na taulo zinakauka vizuri, ili kuepuka unyevu unaosababisha ukungu na harufu.

Wataalamu wanashauri kwamba ni vizuri ukaweka utaratibu wa kufanya usafi wa kina (deep cleaning), angalau mara moja kila baada ya miezi mitatu. Hii itafanya nyumba nzima kuwa safi kwa muda mrefu.

Njia za ziada za gharama nafuu

Weka bakuli la kahawa, mkaa au siki kwenye vyumba tofauti husaidia kufyonza harufu mbaya mara moja.

Kwa kifupi, harufu ya nyumba huathiri hisia za wenyeji na wageni. Nyumba safi, yenye harufu ya kupendeza, haileti tu faraja bali pia hufanya mwenyeji ahisi fahari.

Unaweza kuchoma karafuu, ganda la limau au chungwa, kuleta harufu asilia.

Picha zote na PINTEREST.